Астанадағы фельдшер қазасы: сот бейнежазбаны зерттеуде
Астанада фельдшер Ұлдана Мырзуанның қазасына қатысты сот процесінде тұрғын үй қасбетінің құлаған сәті түсірілген бейнежазба көрсетілді.
Сурет: stan.kz
Астанада фельдшер Ұлдана Мырзуанның қазасына қатысты сот ісі жалғасуда. Бүгінгі отырыста судьялар қылмыстық істің материалдарын қарастыруға кірісті.
Бұл туралы Qazaqtoday.info сайты хабарлайды.
Сот процесі барысында тұрғын үйдің қасбетінің құлаған сәті бейнеленген бейнежазба көрсетілді. Бейнебақылау камерасына түскен кадрларда ғимараттың сыртқы қабырғасының бір бөлігі кенеттен опырылып, айналаны қою шаң басқаны анық көрінеді.
Шаң сейілгеннен кейін ағаштар мен темір қоршау маңында құлаған қаптаманың бөліктері жатқаны байқалады. Сондай-ақ, қасбеттің сынығы жол жиегінде тұрған көліктің үстіне құлаған.
Кейінірек оқиға орнына жедел жәрдем көлігі келген. Біраз уақыттан соң Төтенше жағдайлар министрлігі мен полиция қызметкерлері жетіп, аумақты қоршауға алған. Алайда, бұдан кейінгі оқиғалар бейнежазбада көрсетілмеген.
