Әділет министрлігі некені ұзарту туралы жалған ақпаратты жоққа шығарды
Әділет министрлігі әлеуметтік желілерде таралып жатқан некені ұзарту туралы жалған ақпаратты жоққа шығарып, азаматтарды алаяқтарға сенбеуге шақырды.
Сурет: istockphoto
Әлеуметтік желілерде некені ұзарту қажеттігі туралы алаяқтық сипаттағы жалған хабарлама таралуда. Бұл туралы Әділет министрлігінің ресми өкілі Талғат Уәли мәлімдеді.
Бұл туралы Qazaqtoday.info сайты хабарлайды.
Оның айтуынша, Қазақстанның неке-отбасы заңнамасына сәйкес, неке бір рет қана тіркеледі және оның қолданылу мерзімі шектелмеген. Сондықтан некені қайта тіркеу немесе оның мерзімін ұзарту қажеттілігі жоқ.
Талғат Уәли: «Неке ерлі-зайыптылардың біреуінің немесе екеуінің өтініші бойынша бұзылуы мүмкін. Сондай-ақ заңда көзделген басқа жағдайларда да неке тоқтатылады. Неке тек тіркеуші орган арқылы немесе сот тәртібімен бұзылады», — деп түсіндірді.
Осыған байланысты Әділет министрлігі азаматтарды мұндай хабарламаларға сенбеуге, ондағы сілтемелерге өтпеуге және жеке деректерін бөгде адамдарға бермеуге шақырады.
