Өзбекстан әйгілі Аргентина құрамасымен футболдан кездесу өткізеді

Фото: АФУ

Өзбекстан құрамасы қыркүйектегі халықаралық үзіліс кезінде екі жолдастық кездесу өткізеді. Команда Иран және әлемдік футболдың алпауыттарының бірі Аргентинамен күш сынасады, деп хабарлайды Qazaqtoday.infoақпарат порталы 1bol.kz-ке сілтеп. 

24 қыркүйекте Өзбекстан құрамасы Ташкентте Иранды қабылдайды. Ал 30 қыркүйекте Қытайда Аргентина құрамасымен кездеседі. Аргентиналықтарға қарсы матчта команданы бас бапкер Фабио Каннаваро бастап шығады.

UzDaily мәліметінше, бұл кездесулер Өзбекстан құрамасының 2027 жылғы Азия кубогына дайындығы аясында ұйымдастырылады.

Құрлық біріншілігінде Өзбекстан B тобында өнер көрсетеді. Оның қарсыластары – Бахрейн, Солтүстік Корея және Иордания құрамалары.

Әсіресе Аргентинамен өтетін кездесу Өзбекстан үшін Азия кубогы алдындағы маңызды сынақтардың бірі болмақ. Құрама әлемнің жетекші командаларының біріне қарсы өз мүмкіндігін тексеруге мүмкіндік алады.