Алматыдағы «Гаухартас» тұрғын үй кешенінде өрт шығып, тұрғындар эвакуацияланды
Алматыдағы «Гаухартас» тұрғын үй кешенінде 25 тамыз күні өрт болып, тұрғындар эвакуацияланды. Өрт сөндірушілер оқиға орнына жедел жетіп, жалынды толығымен ауыздықтады.
Сурет: politico.kz
25 тамыз күні кешке Алматыдағы «Гаухартас» тұрғын үй кешенінің 16 қабатты корпусында өрт болды. Құтқарушылар тұрғындарды қауіпсіз жерге көшірді, деп хабарлайды Qazaqtoday.info сайты.
Сағат 21.56-да құтқару қызметіне көпқабатты үйден түтін шығып жатқаны туралы хабарлама түскен. Оқиға орнына келген өрт сөндірушілер тоғызыншы қабаттағы пәтерлердің бірінде диван мен үй мүлкінің өртеніп жатқанын анықтады. Жалын аумағы 4 шаршы метрді құрады, ал қою түтін баспалдақ аралықтарын жылдам толтырды.
Құтқарушылар арнайы автосатыны жайып, тұрғындарды эвакуациялау жұмыстарын жедел ұйымдастырды. Олардың үйлесімді әрекеттерінің арқасында өрт сағат 22.28-де оқшауланып, сағат 22.36-да толығымен сөндірілді.
