Алматыдағы MEGA Alma-Ata сауда орталығында өрт дабылы іске қосылды
Алматыдағы MEGA Alma-Ata сауда орталығында өрт дабылы іске қосылып, келушілер эвакуацияланды. ТЖД өрт дабылының себебін анықтады.
Сурет: egemen.kz
Алматыдағы MEGA Alma-Ata сауда ойын-сауық орталығында өрт дабылы іске қосылып, келушілер ғимараттан жаппай эвакуацияланды, деп хабарлайды Qazaqtoday.info сайты.
Әлеуметтік желілерде А.Розыбақиев көшесіндегі сауда орталығынан адамдардың эвакуацияланғаны және оқиға орнына өрт сөндіру көліктерінің келгені түсірілген кадрлар тарады. Сауда орталығы әкімшілігінің хабарлауынша, ғимаратта автоматты өрт дабылы іске қосылған. Қазіргі уақытта жағдай бақылауда, барлық жүйе штаттық режимде жұмыс істеп тұр. Сауда орталығы жұмысын жалғастырып жатыр.
«Келушілердің өмірі мен денсаулығына қауіп жоқ. Қазір тексеру жүргізіліп, оқиғаның мән-жайы анықталып жатыр», делінген хабарламада. Алматы қаласының Төтенше жағдайлар департаменті де шақырту бойынша жоғары деңгейлі қауіп расталмағанын мәлімдеді. Оқиға орнынан ашық жалын анықталмаған. Кейін Алматы қаласы ТЖД өрт дабылының іске қосылуына қысқа тұйықталу себеп болғанын нақтылады.
Еске сала кетейік, бұған дейін Абай облысындағы Орлов кенішінде өрт шығып, жұмысшылар шұғыл эвакуацияланған болатын.
