Ресей Қазақстан арқылы Батысқа Украина жөнінде сигнал жібермегенін мәлімдеді
Ресей СІМ өкілі Михаил Галузин Қазақстан арқылы Батыс елдеріне Украина жайында сигнал бермегенін айтты. Тоқаевтың Путинге ұсынысы туралы толығырақ.
Сурет: ulysmedia.kz
Ресей Қазақстан арқылы Батыс елдеріне Украина жайында ешқандай сигнал бермегенін мәлімдеді. Бұл туралы Qazaqtoday.info сайты хабарлайды.
Бұл мәлімдемені Ресей Сыртқы істер министрінің орынбасары Михаил Галузин жасады. Оның айтуынша, Мәскеудің «қазақстандық достарын» Украина мәселелерімен алаңдатуға ешқандай қажеттілігі жоқ.
«Өйткені біз киевтік режимге ықпал ете алатындармен тікелей байланыс ұстап отырмыз. Бұл күштердің бізді жақсы еститінін айта алмаймын, бірақ біз бұл бағыттағы жұмысты жалғастырудамыз», — деген Галузиннің сөзін ТАСС агенттігі келтірді.
Айта кетейік, 25 шілдеде Қазақстан Президенті Қасым-Жомарт Тоқаев Ресей Президенті Владимир Путинмен кездесу барысында Украинадағы жағдайды реттеуге қатысты Еуропа мен АҚШ-тан сигналдар алатынын айтқан. Сондай-ақ ол ресей-украин соғысын тоқтату үшін қақтығысты «мұздатуды» ұсынған еді.
