Қанды қылмыс: ШҚО-да кәсіпкер әйелді үйінде өлтіріп кетті

Фото: ШҚО ПД

Шығыс Қазақстан облысы Белоусовка кентінде белгілі кәсіпкер әйелдің отбасына шабуыл жасалды. Салдарынан әйел қаза тапты, деп хабарлайды Qazaqtoday.info.

Telegram-дағы «Криминальный Казахстан» арнасында жарияланған мәліметке сүйенсек, 23 шілдеде Белоусовка кентінде белгісіз біреулер жеке үйге басып кіріп, отбасына шабуыл жасаған. Оқиға салдарынан жергілікті кәсіпкер мерт болған, ал оның күйеуі жарақатпен Өскемендегі ауруханаға жеткізілген.

Дәрігерлердің мәліметінше, оның жағдайы орташа ауыр. ШҚО ПД 23 шілдеде Белоусовка кентінде аса ауыр қылмыс жасалғанын растап, қылмыстық іс қозғалғанын мәлімдеді.

«Цифрлық құралдарды қолдану және азаматтардың көмегі арқасында жедел-іздестіру шаралары барысында полиция қызметкерлері күдіктілерді анықтады. Олар өңірден тыс жерге қашып кетпек болған кезде ұсталды», — деп түсіндірді облыстық ПД баспасөз қызметі.

Қазіргі уақытта қажетті тергеу амалдары жүргізіліп жатыр. Тергеу барысы ерекше бақылауға алынған. Өзге ақпарат жарияланбайды.