Павлодар облысында сүт фермасындағы апаттан алты адам қаза тапты
Павлодар облысы Жоламан ауылындағы сүт фермасында болған апаттан алты адам қаза тауып, біреуі ауруханада жатыр. Әкім Асаин Байханов қаза тапқандардың отбасыларына көмек көрсетілетінін жеткізді. Қылмыстық іс қозғалды.
Сурет: tengrinews.kz
Павлодар облысының Жоламан ауылындағы сүт фермасында 20 шілдеде таңертең қайғылы оқиға болды. «Aktogai Milk» жауапкершілігі шектеулі серіктестігінің аумағында алты адам, оның ішінде 17 жасар жасөспірім мерт болды. Тағы бір жұмысшы көмірқышқыл газынан уланып, Ақтоғай ауруханасына жеткізілді, оның жағдайы орташа ауырлықта деп бағалануда. Бұл туралы Qazaqtoday.info сайты хабарлайды.
Облыс әкімі Асаин Байханов оқиға болған кәсіпорынға барып, қаза тапқандардың отбасы мүшелерімен кездесіп, көңіл айтты. Әкімдіктің баспасөз қызметінің мәліметінше, сүт фермасының қызметкерлері жазатайым оқиға салдарынан қаза болған. Нақты себептер әзірге айтылмайды. Әкім отбасыларға мемлекеттік органдар мен жұмыс беруші тарапынан қажетті көмектің барлығы көрсетілетінін жеткізді.
«Отбасыларға арнайы материалдық көмек беріледі, жыл соңына дейін жалақы төленеді, несиелерін өтеуге көмектесіледі. Кәсіпорын кәмелетке толмаған балаларды 18 жасқа толғанға дейін асырау және оқыту шығындарын өз мойнына алады», – деп мәлімдеді Павлодар облысы әкімдігінің баспасөз қызметі.
Байханов Еңбек инспекциясы комитетінің департаментіне, полицияға және облыс прокуратурасына оқиғаның тергеуін ерекше бақылауға алуды, барлық мән-жайды объективті түрде анықтауды, сондай-ақ еңбек қауіпсіздігі талаптарын бұзған адамдардың жауапкершіліктен құтылуына жол бермеуді тапсырды.
Бұған дейін «Стальмонтаж», «Актогай-Агро» және «Aktogai Milk» компанияларының бас директоры, Павлодар облыстық мәслихатының депутаты Александр Терентьев мәлімдеме жасап, қаза тапқандардың туыстарына көңіл айтып, кәсіпорын отбасыларға барлық қажетті көмек пен қолдау көрсететінін айтты.
Адам өлімі фактісі бойынша полиция қылмыстық іс қозғады. Сотқа дейінгі тергеу жалғасуда.
