Қарбызды қазірше жеуге болмайды: Ауыл шаруашылығы министрлігі себебін түсіндірді
Ауыл шаруашылығы вице-министрі Азат Сұлтанов қарбызды әзірше жеуге болмайтынын, оның ішінде балаларға қауіпті екенін ескертті. Қауіпсіз уақыт – шілде соңы мен қыркүйек.
Қарбызды әзірше тағамға пайдаланбау керек. Ауыл шаруашылығы министрінің орынбасары Азат Сұлтанов қазақстандықтарға, әсіресе балаларға қарбыз беруден бас тартуға кеңес берді. Бұл туралы үкіметтегі брифингте айтылды, деп хабарлайды Qazaqtoday.info сайты.
Азат Сұлтановтың айтуынша, бақша дақылдары бірнеше маусымда өсіріледі. Қарбыз сатып алудың ең қауіпсіз уақыты – шілде айының соңы мен қыркүйек аралығы. Ол бұл кезеңде қарбыздар тыңайтқыштар мен өсу стимуляторларын қолданбай пісетінін атап өтті.
«Бұл кезеңде олар ешқандай қоспаларсыз піседі. Сондықтан әзірше, әсіресе балаларға, қарбыз беруден аулақ болған жөн. Бұл менің сарапшы ретіндегі пікірім», – деді вице-министр.
Ол сондай-ақ басқа елдерден және Қазақстанның оңтүстік өңірлерінен әкелінетін жеміс-көкөніс өнімдері фитосанитарлық бақылаудан өтетінін, яғни зиянкестер мен аурулардың бар-жоғы тексерілетінін түсіндірді. Дегенмен, вице-министр химикаттардың шамадан тыс қолданылу мәселесі де бар екенін атап өтті. Олардың қалдық мөлшері адамдарға қауіпті болуы мүмкін. Бұл мәселе бойынша Ауыл шаруашылығы министрлігі санитарлық-эпидемиологиялық қызметпен бірлесіп жұмыс істейді.
