Қытай Қазақстанға 40 тоннаға жуық қауіпті шабдалы мен сәбіз жіберген
Фото: Ауыл шаруашылығы министрлігі
Қытайдан Қазақстанға 40 тоннаға жуық қауіпті шабдалы мен сәбіз жіберілгені анықталды, деп хабарлайды Qazaqtoday.info.
«Нұр Жолы» фитосанитариялық бақылау бекетінде мұқият тексеру мен зертханалық сараптама барысында жалпы салмағы 39,52 тоннаны құрайтын екі бірдей жүк легінен қауіпті зиянкестер анықталды.
«Салмағы 19 тонна шабдалы партиясынан карантиндік нысан шығыс жеміс жемірі табылды. Ал салмағы 20 тонна сәбіз партиясынан алтын түсті картоп нематодасы анықталды. Өсімдіктер карантині саласындағы халықаралық және ұлттық заңнама талаптарына сәйкес, залалданған өнімдердің барлығы жедел кері қайтарылды. Жүк иелеріне қатысты әкімшілік іс қозғалды. Аталған карантиндік нысандар ел аумағына кірген жағдайда азық-түлік қауіпсіздігіне қауіп төндіріп, отандық ауыл шаруашылығы тауар өндірушілерінің өнімдерін шығындауы мүмкін», – делінген Ауыл шаруашылығы министрлігінің хабарламасында.
