Ұрпағың жетесіз болса, құрбанның пайдасы қайсы?: Нұрлан имамның маңызды үндеуі қызу талқыланып жатыр

Фото: alash.kz

Белгілі дінтанушы Нұрлан имам Байжігітұлы бұл мейрамның мәні тек мал шалумен шектелмейтінін ескертті. Имамның пайымдауынша, адам баласы үшін ең үлкен әрі маңызды құрбандық — ар-намысты, иманды және саналы ұрпақ өсіру. Имам құрбан айт туралы «Жібек жолы» радиосына берген сұхбатында айтты.

Нұрлан имам адам қанша жерден құлшылық жасап, мал шалғанымен, егер отбасындағы тәрбие ақсап тұрса, оның қоғамға да, өзіне де пайдасы шамалы екенін ашып айтты:

«Сіз жыл сайын Құрбан айтта ірі қара немесе түйе шалсаңыз да, артыңызда қалған ұрпағыңыз имансыз, ар-намыссыз, тілсіз, жетесіз болса, ол құрбандықтың сізге қалай көмегі тимек? Бүгінгі таңдағы құрбандықтың ең үлкені – балаңа дұрыс тәрбие беру», — деді ол. 

Дінтанушы өз сөзінде хакім Абайдың мына бір ғибратты ойын мысалға келтірді: «Артыңдағы балаң жаман болса, қай балаңның дұғасы саған жәрдем береді? Сен өзің жаман болсаң, қай балаңның дұғасы сені құтқарады? Егер өзің жақсы болсаң, қай қазақ саған дұға қылмайды?»

Биыл мұсылманның ұлық мерекесі — Құрбан айт 27, 28 және 29 мамыр күндеріне сәйкес келеді.