Назарбаевтың жүрегіне жасалған ота: University Medical Center ресми мәлімет берді
University Medical Center Нұрсұлтан Назарбаевтың жүрегіне ота жасалғаны туралы ақпаратты ескірген деп атады. Экс-президенттің жағдайы тұрақты екені хабарланды.
Сурет: politico.kz
University Medical Center корпоративтік қоры Қазақстанның Тұңғыш Президенті Нұрсұлтан Назарбаевтың жүрегіне ота жасалғаны туралы тараған ақпаратқа қатысты түсініктеме берді. Медициналық орталық бұқаралық ақпарат құралдарында жарияланған мәліметтерді «ескірген әрі өзектілігін жоғалтқан» деп атағанымен, операцияның болғанын тікелей жоққа шығармады, деп хабарлайды Qazaqtoday.info сайты.
Орталықтың баспасөз қызметі қоғамды жалған немесе ескірген ақпарат таратпауға шақырды. Дегенмен, операцияның өзіне қатысты нақты теріске шығару болмағандықтан, оның нақты қашан жасалғаны белгісіз күйінде қалып отыр.
Бұған дейін экс-президенттің баспасөз хатшысы Айдос Үкібай Нұрсұлтан Назарбаевқа жүрегіне операция жасалғанын растаған болатын. Сондай-ақ танымал кардиохирург Юрий Пя процедураның сәтті өткенін мәлімдеген еді.
Дәрігердің айтуынша, ота өткен жылы жоспарланғанымен, экс-президенттің жұмыс кестесіне байланысты кейінге шегерілген. Шамамен екі жарым сағатқа созылған процедурадан кейін науқастың жағдайы тұрақты екені және өміріне қауіп төніп тұрмағаны айтылды.
Мамандар оңалту процесі жоспар бойынша жүрсе, Нұрсұлтан Назарбаевтың жақын күндері медициналық орталықтан шығарылуы мүмкін екенін болжайды. Айдос Үкібай да экс-президенттің қазіргі жағдайы жақсы және дәрігерлердің бақылауында екенін жеткізді.
