Ақтауда 7 жасар баланың басы қақ жарылып қалған
Фото: Облыстық көпсалалы балалар ауруханасы
Ақтауда дәрігерлер басына темір құбыр құлаған 7 жастағы баланың өмірін сақтап қалды. Бұл туралы QazaqToday.info ақпараттық порталы Lada.kz басылымына сілтеме жасап хабарлады.
Маңғыстау облыстық көпсалалы балалар ауруханасының дерегінше, Құрық ауылынан келген бала 10 мамыр күні ауыр жарақатпен шұғыл түрде ауруханаға жеткізілген. Оқиға салдарынан оның басына темір құбыр құлаған. Дәрігерлер науқастың жағдайын аса ауыр деп бағалаған.
Тексеру барысында балаға ашық бас-ми жарақаты, бас сүйегінің көп жарықшақты жаншылып сынуы, ми жарақаты, пневмоцефалия, ликворея, мидың қатты ісінуі, ауыр травмалық шок және постгеморрагиялық анемия диагноздары қойылды.
Дәрігерлер екі сағаттан астам уақытқа созылған күрделі ота жасап, бас сүйегіне трепанация жүргізген. Операция кезінде жаншылған сүйек сынықтары алынып, қатты ми қабығына пластика жасалған.
Қазіргі уақытта баланың жағдайы тұрақталған. Ол есін жиып, өздігінен тамақтанып, ата-анасын тани бастаған. Соған қарамастан, дәрігерлер оның жағдайын әлі де жіті бақылауда ұстап отыр.
