Қонаев қаласының әкімі отставкаға кетті

Фото: gov.kz

Алматы облысындағы Қонаев қаласының әкімі Нұрлан Құматаев өз еркімен қызметінен кетті, деп хабарлайды Qazaq Today ақпарат агенттігі.

Ақпаратты Алматы облысы әкімінің баспасөз хатшысы Жанна Арынбекова растады.

Әкімдіктің мәліметінше, Нұрлан Құматаев басқа қызметке ауысуына байланысты 28 наурызда өз еркімен жұмыстан кетті.

«Нұрлан Құматаевтың басшылығымен Қонаев қаласының 10-шы шағын ауданын дамытудың жоспары жүзеге асырыла бастады. Оның кезінде мектеп құрылысы, жүргізіліп жатқан көппәтерлі тұрғын үйлер құрылысы және кең жолақты жол желісі салына бастады. Сонымен қатар, Құматаев «Ардагер» және «Самал» шағын аудандарын дамыту жобаларына бастамашылық жасады», – делінген хабарламада.

Нұрлан Құматаев 1970 жылы 3 маусымда Оңтүстік Қазақстан облысы, Сайрам ауданында дүниеге келген. 1991 жылы Алматы мемлекеттік медицина институтын бітірген. Оның заңгерлік және экономикалық қосымша білімі бар.

Ол 2020 жылдың 25 мамырынан бастап Қонаев қаласының әкімі қызметін атқарды.