«ЖЭО-ның толық тоқтауы бірінші рет емес» — Жезқазған ЖЭО-да апат болды
«Қазақмыс Энерджи» ЖШС-не қарасты Жезқазған жылу электр орталығында апат болды, деп хабарлайды Qazaq.today Ulysmedia.kz-ке сілтеме жасап.
Кеше, 13 шілде сағат 21:12-де қолайсыз ауа райы жағдайында Ақадыр-Жезқазған 500 кВ электр беру желісі ажыраған.
Электр желісі параметрлерінің өзгеруі Жезқазған ЖЭО-ның №7 және 11 қазандықтарының шаң қоректендіргіш қозғалтқышындағы жиілік түрлендіргіштерінің ажыратылуынан олардың сөнуіне әкелді.
Будың болмауына байланысты №4, 7 турбиналар тоқтады, содан кейін генерация толық төмендеді.
Стансаның жұмыс режимін қалпына келтіру бір сағаттан кейін 22:20-да басталды.
Технологиялық ақау фактісі бойынша жан-жақты тергеу жүргізу мақсатында Атомдық және энергетикалық қадағалау мен бақылау комитетінен комиссия құрылды.
«Жезқазған ЖЭО-ның толық тоқтауы бірінші рет емес. 19 маусым сағат 12:45-те өзінің электр қажеттілігін жоғалту салдарынан станция генерациясы 129-дан 0 МВт-қа дейін төмендеген. Жоғарыда айтылғандардың негізінде Kazakhmys Energy ЖШС басшылығына Жезқазған ЖЭО-ның сенімді жұмысын қамтамасыз ету жөнінде пәрменді шаралар қабылдау тапсырылды» деп хабарлады Энергетика министрлігі.
Айта кетейік, бұдан бұрын Риддер ЖЭО жөндеу шығыны 8 млрд теңгеден асып жығылғаны хабарланған.
Qazaq.today
