Бұқарада Аралды қорғауға арналған кілем-үндеу таныстырылды
Бұқарадағы LESLIE SLM 2026 конференциясында «Жаңа адамдар» Аралды қорғауға арналған кілем-үндеуді таныстырды. Президент Тоқаевтың су ынтымақтастығы туралы сөзі.
Бұқарада өткен LESLIE SLM 2026 халықаралық конференциясында «Жаңа адамдар» қозғалысы Арал теңізінің тағдырына қатысты үндеу бейнеленген кілемді көпшілікке ұсынды. Жер мен су ресурстарын тұрақты басқаруға арналған жиынға зерттеушілер, оқытушылар, мемлекеттік және қоғамдық ұйымдардың өкілдері қатысып, экологиялық мәселелерді талқылады.
Бұл туралы Qazaqtoday.info сайты хабарлайды.
«Жаңа адамдардың» AntiTrash азаматтық науқаны төрт жылдан астам уақыт бойы табиғатты қорғау саласында еңбек етіп келеді. Рұқсат етілмеген қоқыс үйінділеріне қарсы күрестен басталған бастама кейіннен Каспий теңізінің тартылуына арналған акциялар мен перформанстарға ұласты. Бұл істер азаматтық белсенділік пен қоғамның қатысуының мемлекеттік және халықаралық деңгейде қаншалықты маңызды екенін айғақтайды.
Қазақстан Президенті Қасым-Жомарт Тоқаев су ресурстары саласындағы халықаралық ынтымақтастықтың қажеттігін бірнеше рет атап өтіп, Арал теңізін мақсатты әрі ғылыми негізделген әрекеттердің нақты нәтижеге жеткізе алатынының мысалы ретінде келтірген болатын.
«Аймақтың тағдыры тек қана өз қолымызда, сенімді диалог пен елдеріміз арасындағы тығыз ынтымақтастыққа тікелей байланысты. Өңірде су болмаса, Орталық Азия елдерінің де күні қараң. Су жастарымыздың тұрмысын жақсартып, болашағын жарқын етеді. Бүгінгі саммит Халықаралық Аралды құтқару қорының қызметіне тың серпін беріп, халықтарымыздың игілігі жолындағы өңірлік өзара ықпалдастықтың жаңа кезеңіне айналады деп сенемін».
Ұлы Жібек жолының бойында орналасқан Бұқара қаласында «Жаңа адамдар» Арал туралы үндеу бейнеленген кілемді таныстырды. Тарихи жол арқылы тауарлармен бірге ою-өрнектер, білім мен идеялар таралған. Бүгінде осы бейне Орта Азияда су, жер және тіршілікті сақтауға ортақ жауапкершілік бар екенін еске салу тәсіліне айналды. Кілемге «Арал — ортақ жауапкершілік. Оның болашағы күш біріктіруді талап етеді» деген үндеу жазылды.
«Жаңа адамдар» өкілі Бауыржан Аманов: «Аралды қалпына келтіру мемлекеттер арасындағы келісімдерсіз, ғалымдардың ынтымақтастығынсыз және азаматтардың қатысуынсыз мүмкін емес. Солтүстік Аралдың тәжірибесі жүйелі шешімдер мен бірлескен жұмыстың жағдайды өзгерте алатынын көрсетеді. Сондықтан бұл жұмысты жалғастырып, өңір елдері арасындағы ынтымақтастықты кеңейту маңызды. Президент Қасым-Жомарт Тоқаев атап өткендей, ешбір ел жалғыз жортып, табысқа жете алмайды, сондықтан аймақтық және жаһандық деңгейде күш жұмылдыруға баса мән беру керек».
