Петропавлда белгісіз сұйықтықтан уланған үш ер адам қайтыс болды
Петропавлда белгісіз сұйықтықтан уланған 48, 52 және 75 жастағы үш ер адам қайтыс болды. Дәрігерлер соңғы науқастың өмірін сегіз күн бойы сақтап қалуға тырысты.
Фото: ЖИ/ MadeniPortal.kz
Петропавлда құрамында алкоголь болуы мүмкін белгісіз сұйықтықты ішіп уланған үш ер адамның барлығы көз жұмды. Соңғы науқастың өмірін дәрігерлер сегіз күн бойы сақтап қалуға тырысқанымен, нәтиже болмады.
Бұл туралы Qazaqtoday.info сайты хабарлайды.
Қайғылы оқиға салдарынан 48, 52 және 75 жастағы үш ер адам өмірден өтті. Алғашқы екі науқастың қайтыс болғаны бұған дейін хабарланған еді. Кейін ауруханада ауыр жағдайда жатқан 75 жастағы зейнеткердің де өмірден өткені белгілі болды.
Медицина қызметкерлері егде жастағы науқастың өмірі үшін сегіз күн бойы күрескен. Алайда оның жағдайын жақсарту мүмкін болмаған.
Алдын ала мәлімет бойынша, үш ер адам белгісіз сұйықтықты бірге ішкен. Осыдан кейін олардың денсаулығы күрт нашарлаған.
Олардың нақты қандай сұйықтық тұтынғаны және оның құрамында қандай улы заттар болғаны әзірге белгісіз. Сондай-ақ қайғылы жағдайдың барлық мән-жайы туралы толық ресми ақпарат жарияланған жоқ.
