Шыңғыс Айтматовтың қарындасы Роза Айтматова 89 жасында өмірден өтті

Сурет: t.me/news24kg

Шыңғыс Айтматов атындағы қордың Instagram парақшасында жарияланған қайғылы хабарға сәйкес, әлемге әйгілі жазушының туған қарындасы, Қырғызстанның белгілі қоғам қайраткері әрі ғалым Роза Айтматова 89 жасында дүниеден өтті.

Бұл туралы Qazaqtoday.info сайты хабарлайды.

Қор өкілдері марқұмның жақындарына көңіл айтып, оның ғылым мен қоғамға сіңірген еңбегін еске алды. «Роза Айтматованың 89 жасында өмірден өткенін терең қайғымен хабарлаймыз. Роза Төреқұлқызы туралы жарқын естелік жүрегімізде мәңгі сақталады», – делінген қордың хабарламасында.

Роза Айтматова Қырғызстанның ғылым, білім және қоғамдық өмірінде өзіндік орны бар тұлғалардың бірі еді. Ол ұзақ жылдар бойы ұстаздық қызмет атқарып, ғылыми зерттеулермен айналысқан.

Белгілі жазушының қарындасы физика-математика ғылымдарының кандидаты, Қырғызстанның білім беру саласының еңбек сіңірген қызметкері атанған. Роза Төреқұлқызы Маяковский атындағы Қырғыз қыздар педагогикалық институтында білім алған. Кейін Қырғыз КСР Ғылым академиясында ғылыми қызметкер болып жұмыс істеп, жоғары оқу орнында дәріс берген. Ол физика мен педагогика салаларында ғылыми еңбектер жазып, жас мамандарды даярлауға үлес қосқан.

Ғалым өз отбасының тарихын зерттеуге де ерекше көңіл бөлген. Ол жиені Асан Ахматовпен бірге «Тарихтың ақ парақтары» атты кітап жазған. Аталған еңбекте 1930 жылдардағы саяси қуғын-сүргін құрбаны болған әкесі Төреқұл Айтматовтың өмір жолы мен қоғамдық қызметі, сондай-ақ Шыңғыс Айтматовтың балалық шағы туралы баяндалады.

Роза Айтматова қоғамдық қызметте де белсенділігімен танылған. Ол әйелдердің құқықтарын қорғауға және олардың қоғамдағы мүмкіндіктерін кеңейтуге бағытталған бастамаларды қолдап келген. 1996 жылы әріптестерімен бірлесіп, «Әйелдерге көмек көрсету орталығы» қоғамдық ұйымын құрған. Аталған ұйым әйелдердің құқықтарын қорғау және оларға қолдау көрсету бағытында жұмыс істеген.