Корал Харт ЖИ көмегімен 370-тен астам кітап шығарып, $1 млн табыс тапты

Сурет: turkystan.kz

2025 жылдың ақпанынан бері Оңтүстік Африка жазушысы Корал Харт жасанды интеллект көмегімен 370-тен астам кітап жарыққа шығарды. Оның айтуынша, шығармаларының жалпы сатылымы 1 миллион данадан асып, биылғы табысы $1 млн-нан асқан. Алайда бұл әдіс баспа саласында қызу пікірталас тудырып отыр.

Бұл туралы Qazaqtoday.info сайты хабарлайды.

Қырықтан асқан автор әлеуметтік желілерде «алаяқ» және «жауыз» деген сынға ұшырап, ондаған мың жағымсыз хабарлама мен бірнеше өлім қаупін алғанын айтады. Корал Харт – жазушының бүркеншік аты; ол шын есімін жария етпеуді жөн көреді.

Харттың баспа саласында 14 жылдық тәжірибесі бар. Жасанды интеллектіні қолдана бастағанға дейін де бірнеше ондаған шығарма жазған. Жаңа технологияны меңгеруге және кітап жазу үдерісін жүйелеуге үш ай жұмсаған.

Қазір ол ChatGPT, Claude және Grok секілді бірнеше модельді қатар пайдаланады. Әрқайсысының мүмкіндігін өзінше бағалайды: ChatGPT диалог құруға жақсы болғанымен, көркем баяндауда әлсіздеу; Claude оқиға құрылымын жүйелеуге көмектеседі; ал Grok кейбір батыл көріністерді жазуда пайдалы.

Дегенмен автор нейрожеліге жай ғана «кітап жаз» деп тапсырма беру сапалы шығармаға жеткізбейтінін атап өтеді. Алдымен сюжеттің тұжырымдамасын, кейіпкерлердің ерекшеліктерін, жазу стилін және әр тараудың жоспарын өзі әзірлейді. Содан кейін ғана жасанды интеллект мәтін дайындайды.

Алғашқы нұсқа дайын болған соң, ол бірнеше кезеңнен өтеді. Жасанды интеллект мәтінді редакциялап, сюжеттік олқылықтарды, кейіпкерлердің дамуындағы кемшіліктерді және оқиға желісіндегі сәйкессіздіктерді түзетуге көмектеседі. Соңында адам редактор мәтінді тексеріп, жасанды интеллектіге тән сәттерді өңдейді және қажет жерлерін қайта жазады.

Харттың 371 кітабының басым бөлігі, соның ішінде романтикалық шығармалар, белгілі бір оқырман аудиториясына арналып жазылады. Ол нарықты зерттеп, оқырмандардың сұранысына бейімделген туындылар әзірлейді. Автордың бағалауынша, кітаптары электронды, баспа және аудио форматтарында миллионнан астам рет сатылған. Оның романдарының бірі Amazon бестселлерлерінің алғашқы жүздігіне де енген.

Жазушы қазір өз әдісін бірнеше жүз адамға үйрететін жобаны басқарып, Authorythm атты жасанды интеллектімен кітап жазуға арналған бағдарламалық өнімді іске қосуды жоспарлап отыр.

Сонымен бірге оның тәжірибесі әдебиеттегі жасанды интеллектінің рөлі туралы дауды күшейтті. Сыншылар мұндай тәсілмен жасалған шығармаларды сапасыз, жаппай өндірілетін контент деп бағалайды. Ал Харт оқырманның таңдауы мен сатылым нәтижесін басты өлшем санайды.

«Оқырмандар нашар кітап оқымайды, оларды қайтарып береді», – дейді ол.

Жазушының пікірінше, туындыны жасанды интеллект көмегімен жазылғаны үшін ғана қабылдамау дұрыс емес. Оның айтуынша, басты сұрақ шығарманың қалай жасалғанында ғана емес, оқырманға не ұсынатынында.