Алматыда 15 минутта жалған медициналық анықтама беретін орталық карантинге жабылды

Алматыда Жаңа адамдар қозғалысының AntiLIPA азаматтық науқаны жалған медициналық құжаттарды сатуға қарсы рейд өткізді. Науқан аясында медициналық тексерусіз анықтама мен медициналық кітапшаны сатып алуға мүмкіндік беретін клиникалар анықталды.

Бұл туралы Qazaqtoday.info сайты хабарлайды.

Осындай мекемелердің бірі – Аяжан медициналық орталығы. Онда жалған құжатты небәрі 15–20 минутта рәсімдеуді ұсынады. Яғни адам қажетті тексерулерден өтпей-ақ аспаз, тәрбиеші немесе жүргізуші болып жұмысқа орналаса алады. Бұл айналадағы адамдардың денсаулығы мен қауіпсіздігіне елеулі қауіп төндіреді.

AntiLIPA азаматтық науқаны Аяжан медициналық орталығын карантинге жауып, аумақты «Жалған анықтамалар» деген ескерту белгілерімен және «Қауіпті аймақ» арнайы ленталарымен қоршады. Медициналық орталық қызметкерлері мәселенің бар екенін мойындаудан бас тартты. Оқиға орнына құқықтық баға беру үшін құқық қорғау органдарының қызметкерлері келді.

Жаңа адамдар өкілі Жангир Шерлановтың пікірінше, тез әрі арзан жолды таңдауға ұмтылыс, ең алдымен, осындай анықтамаларды сатып алатын қоғамға тән. «Сондықтан өзгерістерді өзімізден бастауымыз керек. Қарапайым шешімдерден бас тартып, жеке басымызға ыңғайлы болғаны үшін алаяқтыққа көз жұма қарауды тоқтатуымыз қажет. Өйткені сұраныс ұсынысты тудырады», – деді ол.