Елназ Қалиахметтің жеңісі Қазақстан әйелдер құрамасын Олимпиадада екінші орынға шығарды

Фото: Rafal Oleksiewicz / FIDE

Самарқанда өтіп жатқан 46-шы шахмат Олимпиадасының ондық турында Қазақстан әйелдер құрамасы Францияны 2,5-1,5 есебімен жеңді. Бұл — соңғы тур алдындағы кездесу. Матчтың тағдыры алты сағаттан кейін ғана шешілді.

Бұл туралы Qazaqtoday.info сайты хабарлайды.

Осы кезге дейін Бибісара Асаубаева жеңіске жеткен, Алуа Нұрман тең ойнаған, ал Меруерт Қамалиденова ұтылған болатын. Есеп тең еді: 1,5-1,5. Барлығы Елназ Қалиахметтің Полин Гишарға қарсы партиясына байланысты болды.

Елназ үшін партия өте ауыр өрбіді. Бір сәтте қазақстандық жеңіліске бір қадам қалғандай көрінді, алайда ол қарсылық көрсетуді жалғастырып, мүмкіндік іздеді. Ол мүмкіндік те табылды: Елназ қарсыласының қатесін пайдаланып, партияның барысын өзгертті де, алты сағатқа жуық ойыннан кейін жеңіске жетті.

Дәл сол ұпай Қазақстанның пайдасына қорытынды есепті 2,5-1,5 етіп белгіледі.

Қазақстанның ерлер құрамасы да ондық турды жеңіспен аяқтады: Түрікменстанды 3-1 есебімен ұтты. Сауат Нұрғалиев пен Жандос Амангов өз партияларында жеңіске жетті, Денис Махнёв пен Алдияр Ансат тең ойнады.

Францияны жеңу Қазақстан әйелдер құрамасына қорытынды тур алдында таза екінші орынға шығуға мүмкіндік берді. Басты бәсекелестердің нәтижелері де өз рөлін ойнады: Қытай мен Үндістан кездесуін тең аяқтады: 2-2, ал Моңғолия Польшаға ұтылды: 1-3.

Он турдан кейін Қытай әйелдер құрамасы 18 командалық ұпаймен көш бастап тұр. Қазақстан 17 ұпаймен екінші орында. Үндістан мен Польшада — 16 ұпайдан.