70 жастағы апа 30 келілік қошқар макетін 40 рет көтеріп таңқалдырды
Шығыс Қазақстандағы көшпенділер фестивалінде 70 жастағы апа 30 келілік қошқар макетін 40 рет көтеріп, көпті таңғалдырды. Ерлер арасында 1 070 және 1 010 реттік нәтижелер тіркелді.
Фото: видеодан скриншот
Шығыс Қазақстан облысындағы Қасым Қайсенов кентінде заманауи көшпенділер фестивалі өтті. Онда 70 жастағы апа салмағы 30 келі болатын қошқар макетін 40 рет көтеріп, көрермендерді де, қатысушыларды да таңғалдырды.
Бұл туралы Qazaqtoday.info сайты хабарлайды.
Фестиваль бағдарламасында арқан тарту, дәстүрлі садақ ату, ләңгі тебу, қошқар бейнесіндегі 30 келілік макетті көтеру, белбеу күресі және асық ату сынды сайыстар болды.
Қонақтар әсіресе 30 келілік қошқар макетімен отырып-тұру сайысына ерекше назар аударды. Бұл оңай сынақ емес еді. Жас кедергі болмады: сайыстың басты жұлдызы 70 жастағы апа атанды.
Ерлер арасында да жоғары нәтижелер тіркелді. Бір қатысушы қошқар макетімен 1 070 рет, тағы бірі 1 010 рет отырып-тұрған. Бұл көрсеткіштер фестивальдің спорттық бағдарламасындағы ең көп талқыланған сәттердің біріне айналды.
Ұйымдастырушылардың айтуынша, сайыстың негізгі мақсаты жеңімпазды анықтау емес. Мақсат — қонақтарды көшпенділердің дәстүрлі ойындарымен таныстырып, олардың бүгінгі өмірде де маңызы бар екенін көрсету. Сондықтан жарыстарда кәсіби спорттағыдай қатаң бәсеке болмады. Мұнда ең маңыздысы — қатысу, эмоция және өз күшіңді сынап көру.
