Павлодарда төрт жасар бала сегізінші қабаттан құлап, аман қалды
Павлодарда төрт жасар бала көпқабатты үйдің сегізінші қабатынан құлап, аман қалды. Ол облыстық балалар ауруханасында ем қабылдап жатыр. Жыл басынан бері облыста терезеден он бала құлаған.
Сурет: depositphotos.com
Павлодарда төрт жасар бала көпқабатты үйдің сегізінші қабатынан құлап, аман қалды. Қазір ол облыстық балалар ауруханасында ем қабылдап жатыр.
Бұл туралы Qazaqtoday.info сайты хабарлайды.
Тengrinews.kz басылымының жазуынша, оқиға 9 қыркүйек күні кешкі уақытта болған. Павлодар облыстық Төтенше жағдайлар департаментінің мәліметінше, бала сегізінші қабаттағы пәтердің балконынан құлаған.
Оқиға кезінде баланың ата-анасы үйде болмаған. Павлодар облыстық балалардың құқықтарын қорғау басқармасының басшысы Зәуреш Қалиеваның айтуынша, баланың анасы кіші сәбиімен аулада жүрген, ал төрт жасар балаға тәтесі қарап қалған.
Ол бір сәтке басқа жаққа бұрылған кезде бала балконға шығып, орындықтың көмегімен кондиционердің үстіне көтерілген. Кейін төмен қарай құлаған.
«Бала алдымен төменгі қабаттардағы кондиционерге, содан кейін ағашқа соғылған. Осы жағдай құлау соққысын жеңілдеткен болуы мүмкін», – деді Зәуреш Қалиева.
Бала шұғыл түрде ауруханаға жеткізілген. Дәрігерлер оның басынан, денесінен және ішкі ағзаларынан көптеген жарақат анықтаған.
Павлодар облыстық балалар ауруханасының мәліметінше, баланың жағдайы ауыр болғанымен, ол есін біледі.
«Мұндай биіктіктен құлау жағдайлары көбіне қайғылы аяқталады. Баланың бірден жерге түспей, жол-жөнекей бірнеше кедергіге соғылғаны соққыны бәсеңдеткен болуы мүмкін. Қазір болжам жасауға әлі ерте», – деп хабарлады аурухана өкілдері.
Дәрігерлер қажетті емдеу және диагностикалық шаралар жалғасып жатқанын мәлімдеді.
Айта кетейік, жыл басынан бері Павлодар облысында көпқабатты үйлердің терезесінен он бала құлаған. Оның үшеуі қаза тапқан.
