Алматыда блогердің үйіндегі жылжымалы есік қызметкердің үстіне құлады
Алматыда блогер Дарья Александрованың үйінде салмағы 400 келі жылжымалы есік клининг қызметкерінің үстіне құлады. Зардап шеккен адам ауруханаға жеткізілді, себебі анықталып жатыр.
Сурет: turkystan.kz
Алматыда блогер әрі әнші Дарья Александрованың үйінде жылжымалы есік тазалау қызметкерінің үстіне құлап, оқиға болды. Салмағы шамамен 400 келі болатын есік клининг компаниясының қызметкеріне құлаған, деп хабарлайды Qazaqtoday.info сайты.
Зардап шеккен адам дереу ауруханаға жеткізілді. Алғашқы кезде сүйек сынуы мүмкін деген күдік болғанымен, кейін дәрігерлер дене соғылуы диагнозын қойды.
Дарья Александрова бұл оқиғаны әлеуметтік желідегі парақшасында айтып, үй ішінде мұндай қауіптің болуын күтпегенін жеткізді. «Бізде салмағы 400 келіге жуық жылжымалы есік құлап кетті. Үйімізде бізді таптап кете жаздайтын мұндай қауіп болады деп ойламаппыз. Егер бұл жағдай түнде, біз бен бір жасар қызымыз ұйықтап жатқанда болса, не боларын ойлаудың өзі қорқынышты», – деді ол.
Оқиғадан кейін үй иелері полицияға хабарласып, терезе мен жылжымалы есіктерді орнатқан компания өкілдерін шақыртқан. Алғашында мамандар есіктің құлауына үйдің шөгуі себеп болуы мүмкін деп болжаған. Алайда тексеріс барысында мұндай белгілер анықталмаған.
«Олар конструкцияны өлшеді, бірақ үйдің шөккені туралы ешқандай белгі таппады. Есесіне жыртылған алюминий импостты анықтады. Металл профильде үзілу пайда болған. Мұндай жағдай ешбір жағдайда болмауы тиіс», – деді Дарья Александрова. Қазіргі уақытта оқиғаның нақты себебі анықталып жатыр.
