Бразилияда тоғыз жасар қыз төрт сағат бойы тоқтаусыз күліп, ауруханаға түсті

Сурет: turkystan.kz

Бразилияда тоғыз жасар қыз бірнеше сағат бойы күлкісін тоқтата алмай, ауруханаға жеткізілді. Дәрігерлер балада сирек кездесетін геластикалық ұстама болуы мүмкін деп болжаған. Бұл – адамның еркінен тыс күлуі немесе жымиюымен сипатталатын эпилепсиялық ұстаманың бір түрі, деп хабарлайды Qazaqtoday.info сайты.

Шетелдік БАҚ-тың жазуынша, оқиға Бразилияның Минас-Жерайс штатындағы Контажен қаласында болған. Қыздың анасы Алинн Барбосаның айтуынша, қызы Эдуарда үйде кенеттен күле бастаған. Алғашында туыстары оны қалжыңдап отыр деп ойлаған.

Алайда шамамен жарты сағат өткеннен кейін анасы қызының күлкісін тоқтата алмай жатқанын түсінген. Ол Эдуардамен сөйлесуге тырысып, күлуін тоқтатуын сұрағанымен, қыз жауап бере алмаған. Бала тек ыммен өзін тоқтата алмай жатқанын білдірген.

Анасы қызының қарашығы үлкейіп, ерні құрғағанын да байқаған. Осыдан кейін оны дереу ауруханаға апарған.

Контажен қалалық ауруханасының дәрігерлері балада геластикалық ұстама болуы мүмкін деген болжам жасаған. Медициналық көмек көрсетілгеніне қарамастан, Эдуарда тағы екі жарым сағаттай күлген. Жалпы алғанда, ұстама төрт сағаттан астам уақытқа созылған.

Анасының сөзінше, осы уақыт ішінде қыздың жағдайы ауыр болған. Бұлшықеттері қатайып, жүзінен көмек сұрап тұрғандай күй байқалған. Эдуарда әбден әлсіреп, анасының қолында ұйықтап қалғаннан кейін ғана күлкі тоқтаған.

Геластикалық ұстама – сирек кездесетін неврологиялық жағдай. Дегенмен дәрігерлер қызға эпилепсия диагнозын қоймаған. Мамандар бұл жағдайға баланың қатты мазасыздануы немесе күйзелісі себеп болуы мүмкін екенін жоққа шығармаған.

Бұған дейін мұндай ұстама қайталанбағандықтан, дәрігерлер оған арнайы дәрі-дәрмек тағайындамаған.

Келесі күні Эдуарда өзін қалыпты сезініп оянған. Оқиғадан кейін қызда тоқтаусыз күлу ұстамасы қайта байқалмаған.