Алимент қарызы үшін: Рудный тұрғыны сот орындаушысына пышақ жұмсап, 15 жылға сотталды
Қостанай облысында алимент төлемеген Рудный тұрғыны сот орындаушысына пышақ жұмсап, 15 жылға сотталды. Толық мәлімет Qazaqtoday.info сайтында.
Сурет: politico.kz
Қостанай облысында алимент төлемеген Рудный қаласының тұрғыны сот орындаушысына пышақпен шабуыл жасағаны үшін 15 жылға бас бостандығынан айырылды, деп хабарлайды Qazaqtoday.info сайты.
Алқабилер қатысқан сот отырысында үкім шығарылды. Тергеу деректері бойынша, ер адам 2012 жылдан бері кәмелетке толмаған балаларына алимент төлеуден қасақана жалтарған. Оның қарызы 9 миллион теңгеден асқан. Сот орындаушысы Жансұлу Хамзина қарызды өндіру үшін заңға сәйкес шаралар қолданған.
2026 жылдың ақпанында ер адам әйелдің жұмыстан шығуын күтіп, оны соңынан аңдыған. Сот орындаушысы көлігіне отырған сәтте оған пышақпен шабуыл жасаған. Ол әйелдің мойны мен бетіне төрт рет пышақ сұққан.
Шабуыл кезінде пышақтың жүзі сынып, әйел бұл сәтті пайдаланып қарсылық көрсеткен. Ол көліктен шығып, көмек шақырған. Салдарынан сот орындаушысының беті мен сол білегі жарақаттанған.
Қылмыстан кейін күдікті оқиға орнынан қашып, ізін жасыруға тырысқан. Алайда полиция оны ұстаған.
Іс алқабилердің қатысуымен қаралып, ер адам сот орындаушысының өміріне қастандық жасағаны үшін кінәлі деп танылған. Сот оны 15 жылға бас бостандығынан айырып, жазасын қылмыстық-атқару жүйесінің орташа қауіпсіздік мекемесінде өтеуді тағайындаған.
