Атырау облысында 37 жастағы ер адам әйелін өлтірді деген күдікпен ұсталды
Атырау облысында азаматтық некедегі әйелін өлтірді деген күдікпен 37 жастағы ер адам қамауға алынды. Қылмыстық іс қозғалды.
Сурет: ult.kz
Атырау облысында азаматтық некедегі әйелін өлтірді деген күдікпен 37 жастағы ер адам қамауға алынды, деп хабарлайды Qazaqtoday.info сайты.
Облыстық полиция департаментінің мәліметінше, қайғылы оқиға тұрмыстық жанжал кезінде орын алған. Күдікті уақытша ұстау изоляторына қамалып, оған қатысты Қылмыстық кодекстің «Адам өлтіру» бабы бойынша іс қозғалған. Қазір тергеу амалдары жүргізіліп жатыр.
Марқұмның жақындарының сөзіне сүйенсек, әйел пышақтан алған көптеген жарақат салдарынан көз жұмған. Бұл оқиға оның үш жасар қызының көз алдында болған. Ал келесі күні үйге келген 16 жасар қызы анасының мәйітін тауып алған.
Қазіргі уақытта күдікті қамауда отыр. Құқық қорғау органдары тергеу мүддесіне байланысты оқиғаның өзге мән-жайларын жарияламайтынын мәлімдеді.
