Украина Уайлдберриз қоймаларына қайта дронмен шабуыл жасады

Украиналық дрондар Ресейдің Краснодар және Ставрополь өңірлеріндегі Уайлдберриз маркетплейсінің екі логистикалық орталығына шабуыл жасады, деп хабарлайды Qazaqtoday.info сайты.

Компания басшысы Татьяна Кимнің мәлімдеуінше, Краснодар мен Невинномысск қалаларындағы қоймалардан барлық қызметкерлер эвакуацияланған. Дегенмен зардап шеккендер бар екені айтылады.

Ставрополь өлкесінің губернаторы Владимир Владимировтың сөзіне сүйенсек, Невинномысскідегі қоймадағы өрттен бес адам жарақат алған. Дәрігерлер оларға оқиға болған жерде медициналық көмек көрсеткен.

Краснодардағы қоймаға жасалған шабуылдан үш адам зардап шеккен. Өртті сөндіру үшін тікұшақ жұмылдырылған.

Бұл – Украинаның бір апта ішінде Уайлдберриз қоймаларына жасаған екінші дрон шабуылы. Алдыңғы шабуыл 18 шілдеде Тамбов облысындағы Котовск және Мәскеу облысындағы Электросталь қалаларындағы логистикалық орталықтарға жасалған. Сонда сегіз адам қаза тауып, 80-ге жуық адам жараланған болатын.

Украина президенті Владимир Зеленский бұл нысандардың таңдалуын олардың ішінде дрон өндірісіне арналған бөлшектер мен навигациялық жабдықтардың сақталуымен түсіндірген. Алайда Ресей тарапы бұл мәлімдемені әзірге растамады.