Қазақстандық жасөспірімдер түнгі клубтарда ұсталып жатыр
Қазақстандағы профилактикалық рейдтер барысында 2400-ден астам кәмелетке толмаған өспірім полицияға жеткізілді, 1500-ге жуық ата-ана жауапқа тартылды.
Сурет: qumash.kz
Қазақстанның бірнеше облысында жүргізілген профилактикалық рейдтер барысында 2400-ден астам кәмелетке толмаған өспірім полицияға жеткізілді, деп хабарлайды Qazaqtoday.info сайты.
Polisia.kz мәліметінше, 1-3 шілде аралығында Алматы мен Шымкентте, Алматы, Жамбыл, Маңғыстау, Павлодар, Солтүстік Қазақстан, Қызылорда облыстарында, Абай және Ұлытау облыстарында ауқымды профилактикалық іс-шаралар өтті. Рейдтерге 3 мыңға жуық полиция қызметкері тартылды.
Полиция органдарына 2400-ден астам кәмелетке толмаған жеткізілді, оның 1500-ден астамы әкімшілік құқық бұзушылық жасағаны үшін, ал 1000-ы қараусыз және панасыздығы үшін. Барлығы 4 мыңға жуық әкімшілік құқық бұзушылық анықталды. Бала тәрбиесі бойынша міндеттерін орындамағаны үшін 257 ата-ана әкімшілік жауапкершілікке тартылды. Балалар мен жасөспірімдердің түнгі уақытта көшеде және ойын-сауық мекемелерінде болғаны үшін 1500-ге жуық ата-ана жауапқа тартылды.
ІІМ ата-аналарға: «Балалардың қауіпсіздігі – ең алдымен, отбасының жауапкершілігі. Жазғы демалыс кезеңінде балалардың жұмыспен қамтылуына ерекше көңіл бөлуді, балаларыңыздың қайда жүргенін, кіммен араласатынын және бос уақытын қалай өткізетінін білуді сұраймыз», – деп үндеу жасады.
Қаскелеңде жасөспірімдер тобы маскүнем ер адамдарды ұрып-соқты. Бұған дейін шенеуніктер сағат 22:00-ден кейін жасөспірімдердің курьер, даяшы және басқа да жұмыстарда істей алмайтынын түсіндірген болатын.
