«Балаларыма тиесілі дүниені қайтарсын!»: Шавкат Рахмоновтың экс-әйелі мүлікке таласуын тоқтатар емес
Коллаж: qazaqtoday.info
Қазақстандық UFC жауынгері Шавкат Рахмоновтың жұбайы Гүлайым Рахмонова әлеуметтік желіде отбасына қатысты кезекті мәлімдемесін жариялады, деп хабарлайды Qazaqtoday.info ақпарат порталы.
Оның айтуынша, балаларына тиесілі пәтер мен басқа да мүліктер әлі күнге дейін қайтарылмаған. Осыған байланысты ол Instagram Stories парақшасында бұрынғы енесіне ашық үндеу жолдады.
Гүлайым мәселені заң аясында және бейбіт түрде реттеуге дайын екенін айтып, адвокаты арқылы келіссөз жүргізуді ұсынды. Сонымен қатар, егер байланыс болмаса, «тиісті орындарға жүгінетінін» мәлімдеді.
«Осы уақытқа дейін құрсағымдағы балам үшін үндемей, сабырмен күттім. Шавкаттың анасы менің пәтерімді және балаларға тиесілі дүниелерді қайтарсын! Мен ұлын қайтардым, енді ол пәтерді қайтарсын! Менің адвокатыммен байланысып, бәрін бейбіт түрде шешейік. Әйтпесе менің де жоғалтатын ештеңем жоқ (маған қатысты қорлайтын видеолар, жазбалар мен суреттер бар). Ал менің уақытым жоқ, балаларымды асырауым керек. Сіздердің кесірлеріңізден балалар аш отыр, дәрі-дәрмек алуға да шамамыз жетпейді. Ертең хабарласасыздар деп үміттенемін. Егер хабар болмаса, көпшілік алдында тиісті органдарға жүгінемін. Мен сіздің мені бақылап, бәрін оқып отырғаныңызды білемін», – деп жазды ол.
Еске салайық, Гүлайым Рахмонова соңғы уақытта әлеуметтік желілерде жеке өмірі мен Шавкат Рахмоновпен арадағы қарым-қатынасына қатысты түрлі жазбалар жариялап келеді. Ол бұған дейін де қоғам назарын аудартқан бірнеше мәлімдеме жасаған болатын.
Коллаж: qazaqtoday.info
