Фото: әлеуметтік желіден
Алматыда 12 жастағы жасөспірім пышақ жарақатынан көз жұмды. Бұл туралы ақпарат әлеуметтік желілерде тарады, деп хабарлайды Qazaqtoday.info.
Әлеуметтік желілерде жарияланған мәліметтерге сәйкес, балаға 13 жастағы екі жасөспірім тоғыз жерден пышақ жарақатын салған. Қайғылы жағдай 10 маусым күні Түрксіб ауданында болған.
Қанды оқиғаға қатысты Алматы қаласының полициясы ресми түсініктеме берді.
Полиция департаментінің мәліметінше, аталған қылмысты жасады деген күдікпен Алматы қаласының 13 жастағы тұрғыны ұсталды. Ол марқұммен бұрыннан таныс болған.
Алдын ала анықталғандай, қайғылы оқиға кәмелетке толмағандар арасында туындаған жанжалдың салдарынан болған. Қазіргі уақытта күдікті арнайы мекемеге орналастырылды.
Адам өлтіру фактісі бойынша қылмыстық іс қозғалды. Оқиғаның барлық мән-жайын толық әрі объективті анықтауға бағытталған кешенді тергеу шаралары жүргізілуде.
Сондай-ақ тергеу қорытындысы бойынша баланы тәрбиелеу жөніндегі міндеттерін тиісінше орындамағаны үшін ата-аналарды жауапкершілікке тарту мәселесі қаралатын болады.
