Министр Шайдоровқа қатысты ақпараттық шабуыл туралы: Сын дерекке сүйенуі тиіс

Спорт және туризм министрі Ербол Мырзабосынов мәнерлеп сырғанаушы Михаил Шайдоровтың төңірегіндегі жағдайға қатысты пікір білдіріп, спортшыға қарсы мақсатты ақпараттық науқан жүргізілгені туралы сауалға жауап берді. Министр кез келген сын нақты деректерге негізделуі қажет екенін атап өтті, деп хабарлайды Qazaqtoday.info сайты.

Ведомство басшысы бұл мәселеде біреуді айыптаудан аулақ екенін, оның орнына объективтілікке назар аудару керектігін жеткізді. Оның айтуынша, соңғы уақытта Михаил Шайдоровтың жетістіктерін «сәттілікке балау» немесе «жүйеге қарамастан қол жеткізілді» деген сияқты талқылаулар жиілеген. Алайда мұндай пікірталастар спортшының нақты нәтижесі мен күнделікті қажырлы еңбегін көлеңкеде қалдырады.

Сондай-ақ Ербол Мырзабосынов мұндай ақпараттық тартыстар ең алдымен спортшылардың өздеріне зиян келтіретінін баса айтты. Сондықтан ол жасанды дау-дамайды қоздырудың орнына, Қазақстанның абыройын әлемдік аренада асқақтатып жүрген спортшылардың жетістіктері туралы көбірек айтуға шақырды.