Армениядағы сайлау: Пашинян партиясы жеңіске жеткенін жариялады
Армения премьер-министрі Никол Пашинян «Азаматтық келісім» партиясының парламент сайлауында жеңіске жеткенін мәлімдеді. Ол үкіметті дербес құрайтынын айтты.
Сурет: inform.kz
Армения премьер-министрі Никол Пашинян өзі басқаратын «Азаматтық келісім» партиясының парламент сайлауында жеңіске жеткенін мәлімдеді. Саясаткер бұл туралы сайлауалды штабта өткен баспасөз мәслихатында айтты, деп хабарлайды Qazaqtoday.info сайты.
Премьер-министр мәлімдеме жасаған сәтте Арменияның Орталық сайлау комиссиясы бюллетеньдерді санауды әлі толық аяқтамаған еді. Дегенмен Никол Пашинянның сөзінше, дауыс беру нәтижелері оның партиясына үкіметті дербес құруға толық мүмкіндік береді.
«Бұл – Армения Республикасының тұрақтылығы мен одан әрі дамуын қамтамасыз ететін тарихи жеңіс. Елімізде берік институционалдық бейбітшілік орнайды», – деп атап өтті үкімет басшысы. Ол сондай-ақ елде сайлаудан кейінгі саяси тұрақсыздыққа жол берілмейтінін айтты.
