Алматыда дәрігерді соққыға жыққан әйелдің видеосы желіге тарады
Алматыдағы балалар ауруханасында әйел дәрігерге қол көтерді. Медицина қызметкерін соққыға жыққан сәт бейнебақылау камерасына түсіп, видеосы әлеуметтік желіге тарады.
Алматыдағы қалалық клиникалық балалар жұқпалы ауруханасында әйел адамның кезекші дәрігерге қол жұмсаған сәті бейнебақылау камерасына түсіп қалды. Әлеуметтік желіде тараған видеода ана мен медицина қызметкері арасындағы жанжалдың төбелеске ұласқаны анық көрінеді, деп хабарлайды Qazaqtoday.info сайты.
Оқиға 31 мамырға қараған түні болған. Кадрлардан әйелдің дәрігерді бірнеше рет соққыға жыққанын байқауға болады. Арадағы жанжалды аурухананың басқа қызметкерлері мен пациенттердің ата-аналары тоқтатқан. Бұл оқиға қоғамда дәрігерлердің қауіпсіздігі мен кәсіби мәртебесін қорғау мәселесін қайтадан күн тәртібіне шығарды.
Куәгерлердің айтуынша, оқиғадан кейін әйел әлеуметтік желіде өзін жәбірленуші ретінде көрсетіп, жазба жариялаған. Ал желі қолданушыларының басым бөлігі кез келген жағдайда медицина қызметкеріне күш көрсетуді айыптап, пікір қалдыруда. Қазіргі уақытта құқық қорғау органдары тарапынан оқиғаға қатысты ресми мәлімдеме жасалған жоқ.
