Сурет: ru.qaz365.kz
Ресейлік журналист Анастасия Рацкевич қазақстандық мәнерлеп сырғанаушы Михаил Шайдоровтың жалақысына қатысты даулы жағдайға пікір білдіріп, оның Ресейге ауысуы мүмкін екенін меңзеді деп хабарлайды Qazaqtoday.info сайты.
Сарапшының пікірінше, туындаған жағдайға Шайдоровтың жаңа келісімшартындағы «міндеттемелер» туралы тармақ себеп болған. «Мәнерлеп сырғанауда мұндай талаптар оғаш көрінеді, себебі келесі Олимпиада төрт жылдан кейін ғана болады. 2030 жылға қарай спортшының денсаулығы мен психологиялық жағдайы қалай болатынын алдын ала білу мүмкін емес. Сондықтан Шайдоровтың бұл тармаққа қатысты таңданысы орынды», – деп жазады ресейлік басылым.
Сонымен қатар журналист тараптар ортақ келісімге келе алмаған жағдайда спортшы үшін басқа балама бар екенін атап өтті. «Ең болмағанда, өз спортшыларын қатты жақсы көретін бір елді білеміз. Шайдоровтың дәл сол елдің аумағында жаттығу тәжірибесі де бар. Спортшының өзі Сочиде жаттығу әрдайым ыңғайлы болмағанын айтқанымен, мұндай мүмкіндік жоқ емес», – деп түйіндеді Рацкевич.
Еске сала кетейік, бұған дейін Михаил Шайдоров журналист Тимур Балымбетовке берген сұхбатында Спорт министрлігінен ақпан айынан бері тиесілі жалақысын және маусымға дайындық үшін уәде етілген төлемдерді ала алмай жүргенін мәлімдеген болатын.
