Сөз ұқпас ата-аналар: Алматыда мектеп түлектері отырған автокортеж айып тұрағынан бірақ шықты
Фото: polisia.kz
Алматыда мектеп түлектерінің қатысуымен ұйымдастырылған автокортеж тоқтатылды, деп хабарлайды Qazaqtoday.info.
Бұған дейін мұндай іс-шараларды өткізуге тыйым салынғанына қарамастан, түлектердің бір тобы қала көшелерінде автокөліктер колоннасын ұйымдастырып, жол қозғалысы қауіпсіздігі талаптарын өрескел бұзған. Полиция кәмелетке толмаған 21 жасөспірімнің ата-анасы балаларды тәрбиелеу жөніндегі міндеттерін тиісінше орындамағаны үшін әкімшілік жауапкершілікке тартылды.
Сонымен қатар полиция қызметкерлері ҚР Әкімшілік құқық бұзушылық туралы кодексіне сәйкес көлік құралдарын пайдалану қағидаларын бұзу деректері бойынша 5 әкімшілік хаттама толтырды. Автокөліктер айыппұл тұрағына қойылды.
— Алматыда полиция автокортеж ұйымдастыруға, әсіресе оған кәмелетке толмағандардың қатысуына жол берілмейтіні туралы алдын ала ескерткен болатын. Соған қарамастан кейбір азаматтар заң талаптарын елемеді. Мұндай әрбір дерек бойынша полиция қатаң әрі принципті түрде әрекет етеді. Мерекелік көңіл-күй қоғамдық тәртіпті бұзуға және өзге азаматтардың қауіпсіздігіне қауіп төндіруге себеп болмауы тиіс, — деді Алматы қаласы ПД әкімшілік полиция басқармасының бастығы Әбдінұр Тасыбаев.
Полиция ата-аналар мен мектеп түлектерін мерекені жауапкершілікпен өткізуге, заң талаптарын сақтауға және өз өмірі мен айналасындағылардың қауіпсіздігіне бейжай қарамауға шақырады.
