Ердоған Қазақстанға келеді: Түркістанда Түркі мемлекеттерінің саммиті өтеді

Қазақстан Президенті Қасым-Жомарт Тоқаев Түркия Президенті Режеп Тайып Ердоғанмен телефон арқылы сөйлесті. Түркия басшысы 14 мамырда Қазақстанға жасайтын сапарын растады, деп хабарлайды Qazaqtoday ақпарат агенттігі.

Режеп Тайып Ердоған бұл сапарға үлкен мән беретінін атап өтті. Сапар барысында екіжақты мәселелер талқыланып, Жоғары деңгейдегі стратегиялық ынтымақтастық кеңесінің отырысы өтеді деп жоспарланған. Сонымен қатар Түркістанда Түркі мемлекеттері ұйымының бейресми саммитін өткізу көзделген.

Қасым-Жомарт Тоқаев алдағы кездесулердің екі ел арасындағы қарым-қатынасты нығайту үшін аса маңызды екенін жеткізді.

Бұдан бөлек, Түркия президенті Мемлекет басшысын сәуір айында Антальяда өтетін дипломатиялық форумға қатысуға шақырды. Қасым-Жомарт Тоқаев бұл шақыруды қабыл алды.

Әңгіме соңында екі елдің көшбасшылары бір-бірін келе жатқан Ораза айт және Наурыз мейрамдарымен құттықтады.

Фото: Әлеуметтік желіден