Ауа райы күрт нашарлады: Қазақстанның бірнеше өңірінде жол жабылды
15 ақпанда ауа райының нашарлауына байланысты Ақтөбе, Қызылорда және Батыс Қазақстан облыстарындағы республикалық жолдар жабылды.
Қазақстанда ауа райының күрт нашарлауына байланысты бірнеше облыста республикалық маңызы бар тасжолдарда көлік қозғалысына уақытша шектеу енгізілді, деп хабарлайды Qazaqtoday ақпарат агенттігі.
«ҚазАвтоЖол» ұлттық компаниясы 15 ақпанда боран мен көктайғақ салдарынан жүк және қоғамдық көліктердің жүруіне тыйым салынғанын мәлімдеді.
Ақтөбе облысында келесі жол бөліктері жабылды:
- «Самара-Шымкент» тасжолының Қарабұтақ кентінен Қызылорда облысының шекарасына дейінгі 965-1240 шақырымы;
- Дәл осы тасжолдың Батыс Қазақстан облысының шекарасынан Маржанбұлақ кентіне дейінгі 526-702 шақырымы;
- Сонымен қатар Ақтөбе қаласынан Қарабұтақ кентіне дейінгі 776-965 шақырым аралығында да қозғалыс тоқтатылды.
Қызылорда облысында «Самара-Шымкент» тасжолының Ақтөбе облысының шекарасынан Арал қаласына дейінгі бөлігінде (1240-1362 шқ) шектеу енгізілді.
Батыс Қазақстан облысында Жымпиты кентінен Ақтөбе облысының шекарасына дейінгі 393-526 шақырым аралығында жол жабық.
«Барлық аталған жол бөлігінде көлік қозғалысы шамамен 16 ақпан күні таңғы сағат 8:00-де қайта ашылады деп жоспарланып отыр», — деп ескертті компания өкілдері.
Жолдардың жай-күйі туралы қосымша ақпаратты тәулік бойы жұмыс істейтін 1403 нөмірі арқылы білуге болады.
Фото: Әлеуметтік желіден
