Шымкенттегі Қонаев даңғылында орналасқан тұрғын үй кешенінде ішінде әйел адам болған лифт 12-қабаттан төмен құлаған, деп хабарлайды Qazaqtoday ақпарат агенттігі.
Қалалық Төтенше жағдайлар департаментінің хабарлауынша, оқиға 16 қабатты үйде болған. Лифт белгісіз себептермен кенет төмен қарай қозғалған.
«16 қабатты тұрғын үй кешенінде 12-қабатта тұрған лифт белгісіз себептермен кенет төмен қарай қозғала бастады. Қауіпсіздік жүйесінің іске қосылуы нәтижесінде жеделсаты 7-қабаттың тұсында тоқтады», — деп хабарлады ведомство.
Оқиға орнына шұғыл жеткен құтқарушылар зардап шеккен әйелді лифтіден шығарып алып, ауруханаға жеткізді. Оның табан сүйектері сынып, омыртқасы зақымданғаны анықталды. Дәрігерлер зардап шегушінің жағдайын орташа ауыр деп бағалап отыр.
Полиция бұл дерек бойынша оқиғаның барлық мән-жайын анықтау үшін тергеу шараларын жүргізіп жатқанын хабарлады.
«Тергеу аяқталғаннан кейін процессуалдық шешім қабылданады», — деп түсініктеме берді Шымкент полициясы.
Фото: Әлеуметтік желіден
