Қазақстанда алиментке төленетін қаражаттың мақсатты жұмсалуын бақылау туралы ұсыныс талқыланып жатыр. Белсенділер тобы бұл мәселені Мәжілісте көтеріп, алимент алушыларды есеп беруге міндеттеуді талап етті, деп хабарлайды Qazaqtoday ақпарат агенттігі.
Үндеу авторларының пікірінше, алимент – бірінші кезекте баланың қаражаты, бірақ оның қайда және қалай жұмсалып жатқанын тексеретін ешқандай механизм жоқ. Сондықтан олар төлемді алушыларға міндетті түрде есеп беруді, алименттің мақсатты жұмсалуын заңмен бекітуді және баланың атына арнайы шот ашу мүмкіндігін қарастыруды ұсынды. Айтуларынша, ірі көлемде ақша төлейтін ата-аналар қаражаттың жұмсалуында ашықтықтың болғанын қалайды.
Дегенмен, сарапшылар мен депутаттар мұндай шараларға сақтықпен қарау қажет екенін ескертеді. Бір жағынан, бақылау баланың мүддесін қорғауы мүмкін, екінші жағынан, бұл ата-аналар арасындағы қысым көрсету құралына айналу қаупі бар. Мамандардың айтуынша, әлемдік тәжірибеде алимент жүйесі бірінші кезекте сенімге негізделген, ал даулы жағдайлар туындаса, мәселеге қорғаншылық органдары араласады.
Фото: Әлеуметтік желіден
