Әлеуметтік желіде әйелге күш көрсеткен видеосы тарап кеткен Сурдлимпиада комитетінің вице-президенті Арсен Шакуовты қызметінен босату ұсынылды, деп хабарлайды Qazaqtoday ақпарат агенттігі.
15 қаңтарда әлеуметтік желілерде ер адамның әйелге физикалық күш қолданып, қорқытып, балағаттағаны түсірілген видео тараған болатын. Бұл оқиға қоғамда үлкен резонанс тудырды.
Бүгін бұл мәселеге қатысты Туризм және спорт министрі Ербол Мырзабосынов үкімет отырысынан кейінгі брифингте мәлімдеме жасады.
«Бүгін министрлік Сурдлимпиада комитетіне кезекті жиналыс өткізіп, аталған азаматты вице-президент қызметінен босатуды ұсынды. Спорт министрлігі бұдан былай бұл адаммен сурдспорт бағытында жұмыс істемейді», — деді Мырзабосынов.
Министрдің сөзінше, комитет басшылығы министрліктің ұсынысын орындап, тиісті шешім қабылдауы тиіс.
Арсен Шакуов / Фото: Instagram желісіндегі жеке парақшасынан
