Кредиттер арзандамайды: Ұлттық банк базалық мөлшерлемені өзгертпеді
Ұлттық банктің Ақша-кредит саясаты комитеті базалық мөлшерлемені 18% деңгейінде қалдырды. Бұл шешімге елдегі инфляция қаупі әсер етті.
Қазақстан Ұлттық банкінің Ақша-кредит саясаты комитеті базалық мөлшерлемені ±1 пайыздық тармақ дәлізімен 18% деңгейінде сақтап қалу туралы шешім қабылдады, деп хабарлайды Qazaqtoday ақпарат агенттігі.
Реттеуші бұл қадамды елдегі инфляциялық ахуалды ескере отырып жасады. Жасалған болжамға сәйкес, 2025 жылғы инфляция көрсеткіші 12,3%-ды құрайды деп күтілуде.
«Шешім қабылдау кезінде бірнеше фактор ескерілді. Желтоқсан айындағы инфляция 0,9%-ды құраса, ішкі сұраныс әлі де жоғары. Сонымен қатар, тарифтер мен жанармай нарығындағы өзгерістер бағаға қысым жасауын жалғастыруда», – деп түсіндірді Ұлттық банк өкілдері.
Ұлттық банк базалық мөлшерлемені соңғы рет өткен жылдың қазан айында 18%-ға дейін көтерген болатын. Содан бері бұл көрсеткіш өзгерген жоқ.
