Қостанайдағы №122 мектепке 754 миллион теңгеден астам қаржыға күрделі жөндеу жасалғанымен, сыныптардағы суықтан оқушылар қашықтан оқуға жіберілді, деп хабарлайды Qazaqtoday ақпарат агенттігі.
Мектептегі күрделі жөндеу жұмыстары мерзімінен бұрын аяқталып, шатыры, терезелері мен қасбеті толық жаңартылған еді. Алайда, бұл қуаныш ұзаққа созылмады.
20 қаңтардан бастап оқушылар үйлеріне қайтарылды, себебі білім ошағының іші аяздай суық болып тұр.
Жағдайды тексеруге барған жергілікті мәслихат депутаты ғимараттан бірқатар кемшілік анықтаған. Оның айтуынша, жылу беру жүйесі дұрыс істемейді, ал шүмектен ыстық судың орнына мұздай су ағып тұр.
Мектеп директоры бұл мәселені растап, қазіргі уақытта мамандар салқындықтың себебін анықтап, оны жоюға тырысып жатқанын жеткізді.
Фото: Әлеуметтік желіден
