«GGG-дің ізбасары» қиын қарсыласпен жұдырық түйістірмек
Фото: inbusiness.kz, жеке мұрағат
Виктор Темиров (10-0, 7 KO) орта салмақта бақ сынайтын қазақстандық спортшы саналады. BoxRec.com басылымы оның 1 мамыр күні Германияның Гамбург қаласында рингке қайта оралатынын жазды. Бұл туралы QazaqToday.info ақпараттық порталы inbusiness.kz сайтына сілтеп хабарлайды.
Боксшының қарсыласы – венесуэлалық Карлос Риверо (32-12-1, 21 KO). Жекпе-жек орта салмақ дәрежесінде өтеді және 6 раундқа жоспарланып отыр.
Риверо есімі қазақстандық жанкүйерлерге жақсы таныс деуге болады. Ол 2024 жылы Алматыда қазақстандық Әли Ахмедовпен (25-2, 17 KO) жұдырықтасып, екінші раундта техникалық нокаутпен жеңілген еді.
Карлос соңғы жекпе-жегін 28 наурыз күні Сербияның Бор қаласында өткізді. Ол онда жергілікті боксшы Мильян Джорджевичке (22-2, 12 KO) жол берді.
Ал Темиров соңғы рет ақпан айында рингке шығып, германиялық Доменик Арнольдты (5-1, 2 KO) сұлатып, орта салмақта WBF чемпионы атағын жеңіп алды.
Еске салайық, Виктор Темиров кәсіби рингте «Қасапшы» деген лақап атқа ие. Қазақстандық боксшыны неміс жанкүйерлері атақты жерлесі Геннадий Головкинмен жиі-жиі салыстырады және GGG-дің ізбасары ретінде таниды.
