14 қыркүйекке қараған түні Қарағанды мен Жетісу облыстарында екі ірі жол апаты тіркеліп, 15 адам қаза тапты.
Оқиға жайлы мәліметті «ҚазАвтоЖол» компаниясы таратты.
13 қыркүйек күні сағат 23:30 шамасында Қарағанды – Аягөз – Бұғаз тасжолында Ford Mondeo автокөлігінің жүргізушісі рұқсат етілмеген жерде қарсы жолаққа шығып кеткен. Нәтижесінде ол Changan көлігімен соқтығысып, бес адамның өмірі қиылды.
Араға екі сағат салып, 14 қыркүйек күні сағат 01:40-та Алматы – Өскемен тасжолының 479-шақырымында тағы да жол апаты болды. Оңтүстікке бағыт алған Nissan Cefiro көлігі қарсы жолаққа өтіп, Lada ВАЗ-ға соғылған. Соққыдан кейін көлік Chevrolet Cobalt-қа да соқтығысқан.
«ҚазАвтоЖол» дерегінше, жол апаты болған аумақтардағы жол жабыны сапалы, тегіс әрі ой-шұңқыр жоқ.
Мамандардың айтуынша, дәл осы жағдай кейбір жүргізушілерді жылдамдықты асыруға итермелейді. Қауіпсіздік ережелерін елемеу ақыры адам өмірін жалмайтын қайғылы жағдайға әкеліп отыр.
Фото: ҚазАвтоЖол
