Ақтөбедегі балабақшада бүлдіршіндерге құрттап кеткен ботқа берілген

Ақтөбе облысындағы Қандыағаш қаласында орналасқан «Самал» балабақшасында бүлдіршіндерге құрттап кеткен сұлы ботқасы берілгені анықталды. Бұл туралы Qazaq.today ақпарат агенттігі KTK сілтеме жасап хабарлайды.

Балабақша қызметкерлерінің айтуынша, таңғы ас кезінде тәрбиешілер тағамда жәндіктер барын байқап, дереу дабыл қаққан. Дегенмен, аспаздар мен мейірбикелер бұған көңіл аудармаған. Бақытымызға орай, балалар тағамнан ауыз тимеген.

Санитарлық тексеріс нәтижесі

Оқиғадан кейін балабақшада санитарлық тексеріс жүргізілді. Сараптама барысында сұлы ботқасынан ұсақ қоңыздардың табылғаны расталды. Сондай-ақ қоймада сақталған жарманың ішінде де жәндіктер болғаны анықталды. Мамандардың айтуынша, тағам өнімдерін сақтау талаптары өрескел бұзылған. Қоймада қажетті температуралық және ылғалдық режимдер сақталмаған, ал салыстырмалы ылғалдылықты бақылау құралдары мүлде болмаған.

Жауаптыларға қандай жаза қолданылды?

Аталған заң бұзушылықтар үшін «Самал» балабақшасына 450 мың теңге көлемінде айыппұл салынды. Алайда, бұл соманы нақты кім төлейтіні белгісіз. Өйткені мекеменің басшысы, бас аспаз және мейірбике жұмысынан босатылған. Сонымен қатар, қойма меңгерушісі мен аспаз көмекшілері қатаң сөгіс алды.

Бұл жағдай ата-аналардың алаңдаушылығын тудырып, балабақшалардағы тамақ сапасына қатысты бақылауды күшейту қажеттігін көрсетті.