«Жеңу үшін келемін»: Геннадий Головкин мексикалық Сауль Канелоны үшінші кездесуде жеңетінін айтты

Қазақстандық кәсіпқой боксшы Геннадий Головкин мексикалық Сауль Канело Альвареспен өткен екі кездесудің нәтижесіне өзінің көзқарасын білдірді, — деп хабарлайды qazaq.today ақпараттық агенттігі  Vesti.kz сайтына сілтеме жасап.

Олардың бірінші жекпе-жегі 2017 жылдың қыркүйегінде Лас-Вегаста (АҚШ) өтіп, даулы есеппен аяқталған еді. Ал тура бір жылдан кейін сол қалада Канело төрешілердің шешімімен жеңіске жетті.  Головкин 2022 жылдың 17 қыркүйегіне жоспарланған Канеломен өтетін үшінші жекпе-жекке дайын екенін айтты.

«Алғашқы екі жекпе-жектің нәтижесі мені алаңдатпайды», — деді Головкин DAZN тілшісіне.

Сондай-ақ, ол кәсіпқой бокстағы мансабын жалғастыратынын айтты.

«Мен ешқандай алаңдаушылықты сезінбеймін. Мен үшінші кездесуді асыға күтемін.Егер Канеломен үшінші жекпе-жек өтетін болса, мен оған кейбір қателіктерді түзету мақсатымен емес, жеңу үшін міндетті түрде келемін. Мен біреуге бірнәрсені дәлелдеу үшін боксқа келмедім. Маған ерекше жеңіс керек. Мен мансабымды жалғастырамын, өйткені өзімді керемет сезінемін».

Головкин 9 сәуірде Жапонияның Сайтамада қаласында WBA нұсқасы бойынша орта салмақтағы «суперчемпион» жапондық Риота Муратамен жекпе-жек өткізеді.

Альварес мамыр айында жеңіл салмақтағы WBA тұжырымы бойынша жеңіліп көрмеген чемпион Дмитрий Биволмен кездеседі.