Павлодар облысында прокуратура қызметкері әйелді қағып кетті: отбасы тергеуге күмән келтірді

Павлодарда көлік қағып, ауыр жарақат алған 60 жастағы әйелдің отбасы істің тергелу барысына күмән келтіріп отыр. Оқиға 14 тамызда Нұрмағамбетов пен Қамзин көшелерінің қиылысында болған, көлік тізгінінде Павлодар прокуратурасының қызметкері отырғаны ресми расталған, деп хабарлайды  Qazaqtoday.info ақпарат порталы.

Жәбірленушінің бас сүйегі, қабырғалары мен бұғанасы сынып, басына операция жасалған, кейін ішкі қан кету басталғаны хабарланды. Әйелдің отбасы жүргізушінің тұлғасына байланысты істің әділ тергелуіне алаңдап, тергеуші бейнебақылау камераларындағы жазбалардың сапасы нашар екенін айтқанын жеткізді.

Қазір Қылмыстық кодекстің 345-бабының 2-бөлігі бойынша сотқа дейінгі тергеу жүріп жатыр, істі Павлодар облысының Полиция департаменті тергеп жатыр. Жүргізуші оқиға орнынан қашпаған және жедел жәрдем шақырғаны айтылды, ал апаттың нақты мән-жайы тергеу қорытындысынан кейін белгілі болады.

Видео: @tugyr.kzz