Хромтауда ұзаққа созылған жолдың жөндеуінен тұрғындар ауру болып жатыр
Фото: видео скриншот
Ақтөбе облысының Хромтау қаласында бір айдан астам уақыт бойы созылып жатқан жол жөндеу жұмыстары жергілікті халықтың ашу-ызасын туғызды, деп хабарлайды Qazaqtoday.info ақпарат порталы.
Тұрғындардың айтуынша, бұрынғы асфальттың сапасы жақсы болса да оны қырып алып тастаған, ал жаңасын әлі күнге дейін төсемеген. Соның салдарынан көшеде көтерілген топырақ пен шаң үй ішіне дейін кіріп, терезені ашу мүмкін болмай қалған. Әсіресе балалар мен аллергиясы бар адамдардың денсаулығы нашарлап, сырқаты өршіп бара жатқанын айтып шағымдануда. Осыған байланысты халық жергілікті әкімдіктен жұмыстың нақты қашан аяқталатынын түсіндіруді және жолға су сеуіп, шаңды басуды талап етті.
Әкімдік өкілдері бұл мәселеге қатысты әлі нақты шешім қабылдап, нақты мерзімін атай қойған жоқ.
