Астанадағы базарда жарылыс: үш адам жараланды
Астанадағы базарда болған жарылыстан үш адам зардап шекті. Оқиға Байқоңыр ауданындағы әкімшілік ғимаратта орын алған.
Сурет: kaztag.kz
Астананың Байқоңыр ауданындағы базарда екі қабатты әкімшілік ғимаратта жарылыс болып, үш адам зардап шекті, деп хабарлайды Qazaqtoday.info сайты.
Төтенше жағдайлар министрлігінің баспасөз қызметінің хабарлауынша, Ш. Жиенқұлова көшесіндегі базар аумағында орналасқан ғимараттың бірінші қабатында тандыр самсасын дайындайтын бөлмеде газ-ауа қоспасының жарылуы орын алған. Алдын ала мәліметтер бойынша, 50 литрлік композитті газ баллонының герметикалығы бұзылған. Оқиға орнына жедел түрде ТЖМ бөлімшелері келген. Барлау барысында құтқарушылар үш жарақаттанған адамды тапқан. Олардың барлығы медициналық көмек көрсету үшін ауруханаға жатқызылған.
Жарылыс салдарынан төбе жабыны мен есік ойығы жартылай опырылған. Оқиғаның себептері мен мән-жайы анықталып жатыр.
